ಒಮ್ಜೂರ್ ಗಾರಾಂಕ್ ಪಯ್ಲೆಂ ಉಗ್ತೆಂ ಪತ್ರ್ !
ಒಮ್ಜೂರ್ ಫಿರ್ಗಜ್ ಕೊಡಿಯಾಳ್ಚ್ಯಾ 3 ಮಾಲ್ಘಡ್ಯಾ ಫಿರ್ಗಜಾಂ ಪಯ್ಕಿ ಏಕ್ ಜಾವ್ನಾಸಾ. ತಿಕಾ ಚಡ್ ಉಣೆ 500 ವರ್ಸಾಂಚೊ ಇತಿಹಾಸ್ ಆಸಾ. ಪುಡ್ತುಗೆಜಾಂಚ್ಯಾ ದಂಡವ್ಣ್ಯಾ ವರ್ವಿಂ ಗೋಂಯಾ ಥಾವ್ನ್ ಆಯಿಲ್ಲ್ಯಾ ಲೊಕಾನ್ ಒಮ್ಜೂರ್ ತಾಂಚೆ ಘರ್ ಕರ್ನ್ ಘೆತ್ಲೆಂ. ಏಕ್ ದೆವಾಳ್ ಉಬಾರ್ನ್ ತಿ ಭಾಗೆವಂತ್ ಕುಟ್ಮಾಕ್ ಸಮರ್ಪಿಲಿ ಆನಿ ಹಾಂಗಾಚಾ ಶೆತಾಂ ಭಾಟಾಂನಿ ಕೃಷಿ ಕರ್ನ್ ಆಪ್ಲೆ ದೀಸ್ ಸಾರುಂಕ್ ಸುರು ಕೆಲೆಂ. ಒಮ್ಜೂರ್ಚಿಂ ಪಾನಾಂ ಟಿಪ್ಪುಚ್ಯಾ ಕಾಳಾರ್ ಥಾವ್ನ್ ಬೋವ್ ನಾವಾಡ್ದಿಕ್. ಪಾನಾಂ, ಮಾಡ್ ,ಮಾಡಿಯೊ, ಬೆಳೆಂ, ರಾಂದ್ವಯ್, ಫುಲಾಂ ಅನಿ ಹೆರ್ ಸಬಾರ್ ಥರಾಂಚಿ ಕೃಷಿ ಹಾಂಗಾಚಾ ಲೊಕಾಚಿ ವಿಶೇಷತಾ. ಹಾಂಗಾಚೊ ಲೋಕ್ ಬೋವ್ ಕಶ್ಟಿ. ಅಶೆಂ ಕಷ್ಟ್ ಕಾಡ್ನ್ ಕೃಷಿ ಕರ್ನ್ ಹಾಂಗಾಚಾ ಲೊಕಾನ್ ಆಪ್ಲ್ಯಾ ಕುಟ್ಮಾಕ್ ಬರೊ ಫುಡಾರ್ ಬಾಂದುನ್ ಹಾಡ್ಲಾ ಆನಿ ಆಜ್ ಒಮ್ಜೂರ್ ಗಾರ್ ಸಂಸಾರಾಚಾ ಸರ್ವ್ ಕೊನ್ಶಾನಿಂ ಭರ್ಲ್ಯಾತ್. ವಡ್ ಘರಾಂ ಬಾಂದ್ಲ್ಯಾತ್, ಮಯ್ಲಾಂಗಟ್ಲ್ಯಾನ್ ಚಲೊನ್ ಯೆತಾಲ್ಯಾನಿಂ ಆಜ್ ಕಾರಾಂ ಘೆತ್ಲ್ಯಾಂತ್.
ಪುಣ್ ಇಗರ್ಜ್ ಅಸ್ಚೊ ಜಾಗೊ ಗುಡ್ಯಾಳ್ ಜಾಲ್ಲ್ಯಾನ್ ಆನಿ ಆಯ್ಲೆವಾರ್ ಕಾರಾಂಚೊ ಸಂಕೊ ಚಡ್ ಜಾವ್ನ್ ಆಯಿಲ್ಲ್ಯಾನ್ ಥೊಡ್ಯಾ ವಿಶೇಸ್ ದಿಸಾನಿಂ ಮಿಸಾಕ್ ಯೆತೆಲ್ಯಾಕ್ ಜಾಗೊ ಪಾವಾನಾಸ್ತಾ ಪಾರ್ಕಿಂಗಾಚೊ ಸಮಸ್ಸೊ ಉದೆಲಾ ಯಾ ಸಮಸ್ಸೊ ಆಸಾ ಅಸಲೆಂ ಏಕ್ ಚಿಂತಾಪ್ ಉದೆಲಾಂ.
ಹ್ಯಾ ಸಮಸ್ಸ್ಯಾಕ್ ಪರಿಹಾರ್ ಸೊದುನ್ ಫಿರ್ಗಜೆಚಾ ವಿಗಾರಾಂನಿ ಗೊವ್ಳಿಕ್ ಪರಿಷದೆ ಬರಾಬರ್ ಪಾಟ್ಲ್ಯಾ ದಿಸಾನಿಂ ಇಗರ್ಜೆಂತ್ ಏಕ್ ಜುಂತ್ ಆಪಯಿಲ್ಲೊ. ಹಾಚೆರ್ ಇಗರ್ಜೆಚಾ ಉಜ್ವ್ಯಾಕ್ ಆಸ್ಚಾ ಜಾಗ್ಯಾರ್ ಕೃಷಿ ಕಾಡ್ನ್ 1೦೦ ಗಾಡಿಯೊ ರಾವೊಂಕ್ ಜಾವ್ಂಚೆ ಬರಿ 2 ಮಾಳಿಯಾಂಚೆ ಪಾರ್ಕಿಂಗ್ ಕರುಂಕ್ ಪ್ರಸ್ತಾಪ್ ದವರ್ನ್, ಚಡ್ತಿಕ್ ಮಾಹೆತ್ ದೀನಾಸ್ತಾಂ ಕೇವಲ್ ಥೋಡ್ಯಾ ಜನಾಂಚಾ ಖುಶೆಖಾಲ್ ಹೊ ಪ್ರಸ್ತಾಪ್ ಮಂಜೂರ್ ಕರ್ನ್ ಘೆತ್ಲೊ . ಪುಣ್ ಸಬಾರ್ ಫಿರ್ಗಜೆಗಾರಾಂಕ್ ಹ್ಯಾ ವಿಶ್ಯಾಂತ್ ಬೆಜಾರಾಯ್ ಆಸ್ಲ್ಲ್ಯಾನ್ ಆನಿ ಲೊಕಾಚೆ ಖುಶೆ ವಿರೋಧ್ ಗೆಲ್ಲ್ಯಾನ್ ಗರ್ಜೆಚೊ ಸಂಗ್ತಿ ಸಕ್ಡಾಂಕ್ ಕಳಾಜೆ ಮ್ಹಣ್ ಹೆಂ ಉಗ್ತೆ ಪತ್ರ್ ಬರಂವ್ಚಿ ಗರ್ಜ್ ಪಡ್ಲ್ಯಾ.
ಆಕ್ಷೇಪಾಚಿಂ ಪ್ರಮುಖ್ ಕಾರಣಾಂ:
- ಪ್ರಕೃತೆಚೊ ನಾಸ್
ಹ್ಯಾ ಜಾಗ್ಯಾರ್ ಫಳ್ ದಿಂವ್ಚೆ 30 ಮಾಡ್ ಆನಿ 25 ಮಾಡಿಯೊ ಆಸಾತ್, ತಶೆಂಚ್ ಹೆರ್ ರೂಕ್ ಆನಿ ಝಡಾಂಯ್ ಆಸಾತ್. ಹಾಚೆ ಥಾವ್ನ್ ಇಗರ್ಜೆಕ್ ಸಾವ್ಳಿ, ಬೊರೆಂ ವಾರೆಂ ಆನಿ ಏಕ್ ವಿಶೇಸ್ ಸೊಭಾಯ್ ಮೆಳ್ತಾ. ಪುಣ್ ಹೆಂ ನಾಸ್ ಕೆಲ್ಲ್ಯಾನ್ ಯೆದೊಳ್ ಆಸ್ ಲ್ಲೆಂ ನೈಸರ್ಗಿಕ್ ವಾತಾವರಣ್ ನಪಂಯ್ಚ್ ಜಾತೆಲೆಂ ಆನಿ ಹ್ಯಾ ಜಾಗ್ಯಾರ್ 2೦,೦೦೦ sq. ft ಚೆಂ ಕೊಂಕ್ರಿಟಿಚೆಂ ಬಾಂದಾಪ್ ಜಾತೆಲೆಂ. ಹಾಚೊ ಪರಿಣಾಮ್ ಕಿತೆಂ? ಪಾವ್ಸಿಲೆ ದೀಸ್ ಸೊಡ್ನ್ ವೋತ್ ತಾಪ್ಚ್ಯಾ ಹರೇಕ್ ದಿಸಾಂನಿ ಮಿಸಾಕ್ ಆಯಿಲ್ಲ್ಯಾಕ್ ಇಫೆರ್ನಾಚಾ ಉಜ್ಯಾಂತ್ ಘಾಲ್ನ್ ಯೆಮ್ಕೋಡಾಚೊ ಅನುಭವ್ ಜೀವ್ ಆಸ್ತಾನಾಂಚ್ ಭಗ್ಚೆಂ ತೆಂ ಖಂಡಿತ್.
- ಇಗರ್ಜೆಚ್ಯಾ ಬಾಂದ್ಪಾಕ್ ಮಾರ್
ಹ್ಯಾ ಜಾಗ್ಯಾಚೆರ್ ಬಾಂದ್ಪಾಚೆಂ ಕಾಮ್ ಜಾತಾನಾ ಜೆಸಿಬಿ ಆನಿ ಹೆರ್ ಯಂತ್ರಾಂಚ್ಯಾ ಉಪಯೋಗ ದ್ವಾರಿಂ ಇಗರ್ಜೆಚ್ಯಾ ಬುನ್ಯಾದಿಕ್ ಆನಿ ಬಾಂದ್ಪಾಕ್ ಮಾರ್ ಬಸ್ಚೊ ಸಂಭವ್ ಆಸಾ. ಉಪ್ರಾಂತ್ ವೊಣೊದಿ ಫುಟ್ ಯೇವ್ನ್ ಇಗರ್ಜ್ ಪಡ್ಲ್ಯಾರಿ ಪಡ್ಲಿ. ಹೆಂ ತುಮಿ ಮತಿಂತ್ ಧರುಂಕ್ ಜಾಯ್.
- ಆರ್ಥಿಕ್ ಬೊರೊ
ಎಕಾ ಕಾಂಟ್ರಾಕ್ಟಾರ ಪರ್ಮಾಣೆಂ ಆಯ್ಚ್ಯಾ ತಾರಿಕೆರ್ ಪಿಲ್ಲಾರ್ ಘಾಲ್ನ್ ಏಕ್ ಘರ್ ಬಾಂದಿಜೆ ತರ್ ಏಕ್ sq. ft ಕ್ 1೦೦೦ ರುಪಯ್ ಖರ್ಚ್ ಪಡ್ತಾ. ತರ್ 2೦,೦೦೦ sq. ft ಚಾ ಬಾಂದ್ಪಾಕ್ 2 ಕೊರೊಡ್ ರುಪಯ್ ಜಾಲೆ. ಕಾರಾಂ ರಾವೊಂಕ್ ಘಟಾಯ್ ಚಡ್ ಜಾಯ್ ಜಾಲ್ಲ್ಯಾನ್ 2 ಕೊರೊಡ್ ಖಂಡಿತ್ ಪಾವಾನಾಂ ಜಾತಿತ್. ಆನಿ ಬಾಂದ್ಚೊ ಜಾಗೊಯ್ ಸಮತಟ್ಟ್ ನಾ. ತಾಚೆಂ ಕಾಮ್ ಆನಿ Retaining wall ಬಾಂದುಂಕ್ ಉಣ್ಯಾರಿ 5೦ ಲಾಕ್ ರುಪಯ್ ಚಡ್ತಿಕ್ ಜಾಯ್. ತರ್ ಒಟ್ಟಾರೆ ಹೆಂ 2.5 ಥಾವ್ನ್ 3 ಕೊರೊಡಾಂಚೆ ಯೋಜನ್ ಮ್ಹಣ್ ಧರ್ಯೆತಾ. ಪುಣ್ ಹ್ಯಾ ಬಾಂದ್ಪಾಕ್ 56 ಲಾಕ್ ರುಪ್ಯಾಂಚೊ ಅಂದಾಜ್ ಖರ್ಚ್ ಜಾಯ್ತ್ ಮ್ಹಣ್ ಉಪಾಧ್ಯಕ್ಷನಿಂ ಜುಂತಾರ್ ತಿಳ್ಸಿಲ್ಲೆ . ಹೊ ಐವಜ್ ಕಸೊ ಲೇಕ್ ಕೆಲೊ ? ಖಂಚಾ ಇಜೆನೆರಾನ್ ಹೆ ಲೇಕ್ ದಿಲ್ಲೆಂ? ಲೊಕಾಕ್ ಕಾಂಯ್ ಕಳನಾ ಮ್ಹಣ್ ತುಮ್ಚಿ ಆಲೋಚನ್ ಆಸಲ್ಲೆ ಬರಿ ದಿಸ್ತಾ!
- ಖರ್ಚಾ ವಾಟ್
ಅಶೆಂ ಮ್ಹಣ್ತಾನಾ ಏಕ್ ಗಾಡಿ ರಾವೊಂಕ್ 2.5 ಥಾವ್ನ್ 3 ಲಾಕಾಂಚೊ ಖರ್ಚ್ ಜಾತಾ. ಹೊ ವಾಜ್ಬಿಗಿ? ದುಡ್ವಾಚೊ ಅಸಲೊ ವಿಬಾಡ್ ಗರ್ಜ್ ಗಿ ? ಹಾಚೆ ಥಾವ್ನ್ ಇಗರ್ಜೆಕ್ ಆನಿ ಖಾಸ್ ಕರ್ನ್ ಫಿರ್ಗಜೆಗಾರಾಂಕ್ ಕಿತೆಂ ಫಾಯ್ದೊ? ಕಿತ್ಲಿ ಉತ್ಪತ್ತ್ ಹಾಚೆ ಥಾವ್ನ್ ಯೇವ್ಕ್ ಸಾಧ್ಯ ಆಸಾ? ಆನಿ ಘಾಲ್ಲೆ ಪೈಶೆ ಕೆದಾಳಾ ಅನಿ ಕಶೆ ಪಾಟಿಂ ಯೇವ್ಕ್ ಮ್ಹಣ್ ಲೇಕ್ ಕೆಲಾಂಗಿ? ನಾ ಮ್ಹಣ್ ದಿಸ್ತಾ!
- ಕೊಣೆಂ ಖರ್ಚ್ ಕರುಂಕ್?
ಎದ್ಯಾ ವಡ್ಲ್ಯಾ ಕಾಮಾಕ್ ದುಡು ಖಂಯ್ ಥಾವ್ನ್ ಹಾಡ್ಚೊ? ಫಿರ್ಗಜ್ ಗಾರಾಂ ಥಾವ್ನ್? ತರ್ 4೦೦ ಕುಟ್ಮಾ ಲೆಕಾರ್ ಹರೇಕ್ ಕುಟ್ಮಾನ್ ಫಕತ್ 75,೦೦೦ ರುಪಯ್ ದೀಜಾಯ್! ಕಿತ್ಲಿಂ ಕುಟ್ಮಾ ಹೊ ವಡ್ ಐವಜ್ ದೀವ್ಕ್ ತಯಾರ್ ಆಸಾತ್? ಥೊಡಿಂ ಆಸೊಂಕ್ ಪುರೊ. ಪುಣ್ ಮೊಸ್ತು ಜನಾಂಕರ್ ಕಾರಾಂ ನಾಂತ್ ಆನಿ ಥೊಡ್ಯಾಂಗೆರ್ 2 Wheelers ಮಾತ್ರ್ ಆಸಾತ್. ಹಾನಿ ದೀಜಾಯ್ಗಿ?
- ಮುಖೆಲಿ ಕೋಣ್?
ವಿಗಾರಾನಿಂ ಸುರ್ವೆರ್ ಚ್ ಆಪುಣ್ ಬಾಂದ್ಪಾ ಬಾಂದ್ಚ್ಯಾರ್ ನಾ ಮಳ್ಳೆಂ ತಿಳ್ಸಿಲಾಂ. ಉಪಾಧ್ಯಕ್ಶ್, ಕಾರ್ಯದರ್ಶಿ ಯಾ ಹೆರ್ ಕೊಣೆಯ್ 3 ಕೊರೊಡ್ ಒಟ್ಟುಕ್ ಕರ್ನ್ ಹೆಂ ಪೋಂತ್ ಪಾವೊಂಚೆ ಬರಿ ನಾ. ಆನಿ ವಿಗಾರ್ ಬಾಪಾನಿ ಫಕತ್ ಏಕ ವರ್ಸಾಚಾ ಆವಧಿಕ್ ಅಸ್ಚೆಂ ಮ್ಹಣ್ ಸಾಂಗಲ್ಲೆ ಸಬಾರಾನಿಂ ಆಯ್ಕಾಲಾಂ. ತರ್ ಹಾಚಿ ಜವಾಬ್ದಾರಿ ಘೆವ್ಚಿ ತರೀ ಕೊಣೆ?
- ಮುಖಾರ್ ಕಿತೆಂ?
ಹೆಂ ಬಾಂದಾಪ್ ಜಾಲ್ಯಾರ್ ಇಗರ್ಜೆಚೆಂ ಮೈದಾನ್ ಮೆಳೊನ್ ಒಟ್ಟುಕ್ 16೦ ಗಾಡಿಯೊ ದವ್ರುಂಕ್ ಜಾಯ್ತ್. ಪುಣ್ ಮುಕ್ಲ್ಯಾ ವರ್ಸಾನಿಂ ಕಾರಾಂಚೊ ಸಂಕೊ ಪರ್ತುನ್ ಚಡ್ತಾನಾ ತವಳ್ ಕಿತೆಂ ಕರ್ಚೆಂ? ತವಳ್ ಖಂಚಿ ಕೃಷಿ ಕಾಡ್ಚಿ? ಹೆಂ ತುಮಿ ಚಿಂತ್ಲಾಂಗಿ?
- ಅತೀ ಗರ್ಜೆಚೆ ದೀಸ್
ಎಕಾ ವರ್ಸಾತ್ ಮೆಜುನ್ 10 ದಿಸಾನಿ - ಪಾಸ್ಕಂಚೆ ಫೆಸ್ತ್, ವಡ್ಲೆ ಫೆಸ್ತ್ , ಕ್ರಿಸ್ಮಸ್ , ನವೆಂ ವರ್ಸ್ ಆನಿ ಥೊಡ್ಯಾ ಮೊರ್ನಾಂಕ್ ಚಡ್ ಲೋಕ್ ಜಾತಾನಾ ಮೊಸ್ತು ಕಾರಾಂ ಯೆತಿತ್. ಹಾಚೆ ಖಾತಿರ್ ಇತ್ಲೊ ಖರ್ಚ್ ಗರ್ಜ್ ಗಿ? ಕೊಡ್ಯಾಳಾಂತ್ ಹರ್ಯೆಕಾ ಸುಕ್ರಾರಾ ದೊನ್ಪಾರಾಂಚೆ ಪಳ್ಳೆ ಕಡೆ ಹಜಾರಾನಿ ಕಾರಾಂ ರಾವ್ತಾತ್. ತಾಣಿ ಕಿತ್ಲಿ ಪಾರ್ಕಿಂಗ ಬಾಂದ್ಲ್ಯಾತ್? ಚಿಂತುನ್ ಪೊಳೆಯಾ!
ಅತಾಂ ಸವಾಲ್ ಆಸಾ ಹೆಂ ಸರ್ವ್ ನಿಜಾಯ್ಕಿ ಗರ್ಜ್ ಗಿ ಮಳ್ಳೆಂ. ಮಿಸಾಕ್ ಯೆವ್ಚಾ ಲೊಕಾಕ್ ಖಂತ್ ನಾಸ್ತಾಂ ಮೀಸ್ ಆಯ್ಕೊಂಕ್ ಬೊರಿ ಸವಲತ್ ದಿವ್ಚಿ ನಿಜಾಯ್ಕಿ ಗರ್ಜೆಚೊ ವಿಷಯ್. ತಶೆಂ ಪಾರ್ಕಿಂಗ್ ಸಯ್ತ್ ಗರ್ಜೆಚೆಂಚ್. ಪುಣ್ ಕೃಷಿ ಕಾಡ್ನ್ ಇತ್ಲೊ ಖರ್ಚ್ ಕರ್ನ್ ಪಾರ್ಕಿಂಗ್ ಬಾಂದ್ಚೆ ಪಿಶೆಪನ್ ಚ್ ಸಯ್.
ತರ್ ಹಾಕಾ ದುಸ್ರೊ ಉಪಾವ್ ಕಸಲೊ?
- ಇಗರ್ಜೆ ಭೊಂವ್ತೊನಿ ಖಾಲಿ ಆಸ್ಚೆ ಸುಮಾರ್ ಜಾಗೆ ಆಸಾತ್.
- ಇಗರ್ಜೆಚಾ ದಾವ್ಯಾಕ್ interlock ಘಾಲ್ಲೊ ಪರ್ನ್ಯಾ ಸಿಮಿಸ್ತ್ರೇಚೊ ಜಾಗೊ ಅಸಾ-1500 sq.ft.
- ಇಗರ್ಜೆ ಮೈದಾನಾರ್ ಸ್ಟೇಜ್ ಅಸಾ. ಹಿ ಆಜ್ ಕಾಲ್ ಕೊಣೀ ವಾಪಾರಿನಾಂತ್. ಕ್ರಿಸ್ಮಸ್ ಸಂಭ್ರಮಾಕಿ ಹ್ಯಾ ಬರ ಕಥೊಲಿಕ್ ಸಭೆನ್ ವಿಂಗಡ್ ಸ್ಟೇಜ್ ಆನಿ ಕದೆಲಾಂ ಘಾಲ್ಲಿ.(ತರ್ ತುಮಿಂಚ್ ಜಾಯ್ ಮ್ಹಣ್ ಮಿಸಾಕ್ ಆಯಿಲ್ಲ್ಯಾಕ್ ಪಾರ್ಕಿಂಗ್ ಮೆಳ್ನಾಸ್ತಾಂ ಕಷ್ಟಾರ್ ಘಾಲೆಂ.)1000 sq.ft
- ತಶೆಂಚ್ ಬಸ್ಸ್ ಶೆಡ್ ದುಸ್ರ್ಯಾ ಕಡೆ ಕರ್ಯೆತ್-1000 sq.ft
- ಇಸ್ಕಾಲಾಡೆ ಸಕಯ್ಲ್ ಲಾನ್ ಮೈದಾನಾಂ ಆಸಾತ್. ಥಂಯ್ ಸುಮಾರ್ ಕಾರಾಂ ದವ್ರಿಯೇತ್-4000 sq.ft.
- ಲಾಖಾನಿಂ ಖರ್ಚ್ ಕರ್ನ್ ಪ್ಯಾಚ್ ಘಾಲ್ಲೆ ಪೊರ್ನೆ ಇಸ್ಕಾಲ್ ದೋನ್ ಚ್ ವರ್ಸಾನಿಂ ಬಂದ್ ಪಡ್ಲಾ. ಹೆಂ ಕಾಡ್ಲ್ಯಾರ್ ಸುಮಾರ್ ಜಾಗೊ ಮೆಳ್ತಾ.( ಆತಾಂ ಸಕ್ದಾನಿ ಭುರ್ಗ್ಯಾಂಕ್ ಇಸ್ಕಾಲಾಕ್ ಕೊಡ್ಯಾಳ್ ಘಾಲ್ಚೆಂ, ಒಮ್ಜೂರ್ಚ್ಯಾ ಪಾನಾಂತ್ ಪರ್ತ್ಯಾನ್ ನರ್ಸರಿಕ್ ಅಡ್ಮಿಷಣಾಕ್ ಜಾಹಿರಾತ್ ಘಾಲ್ನ್ ಲೊಕಾಂಕ್ ಮಾಂಕೊಡ್ ಕರ್ಚಿ ಗರ್ಜ್ ನಾ.)-12000 sq.ft
- ತಶೆಂಯ್ ಕೊರೊಡಾನಿ ಖರ್ಚಿಜೆ ಮ್ಹಣ್ ಮನ್ ಆಸಾ ತರ್ ತಾಕಾಯ್ ವಾಟೊ ಆಸಾತ್.
- ಆತಾಂ ಆಸ್ಚೆಂ ಸಮುದಾಯ್ ಭವನ್ ಅನಿ ಪರ್ನೆ ಇಸ್ಕಾಲ್ ಕಾಡ್ನ್ ಏಕ್ ಬರೆಶೆಂ hall ಬಾಂದ್ಯೆತ್. 3 ಕೊರೊಡಾನಿ ಪಾರ್ಕಿಂಗ್ ಸಮೇತ್ hall ಬಾಂದ್ಯೆತಾ. ಅಕಾಲಿಕ್ ಪಾವ್ಸ್ ಯೆತಾನಾ ಥಂಯ್ ಹಾಂಗಾ hall ಖಾತಿರ್ ವಾಣೋ ಝರಂವ್ನ್ ತಕ್ಲಿ ಹುನ್ ಕರ್ಚಾಕಿ ಫಿರ್ಗಜೆಚೆಂಚ್ hall ಆಸ್ಲ್ಲ್ಯಾರ್ ಸಬಾರಾಂಚಾ ಗರ್ಜೆಕ್ ಪಡ್ತಲೆಂ ಆನಿ ಹಾಚೆ ಥಾವ್ನ್ ಬರೊ ಆದಾಯ್ ಸಯ್ತ್ ಜೊಡ್ಯೆತ್.
- ನಾ ತರ್ ಇಗರ್ಜೆ ಲಾಗ್ಸಿಲೆ ಜಾಗೆ ಮೋಲ್ ದೀವ್ನ್ ಘೆವ್ಯೆತ್. ಹೆಂ ಕೆಲ್ಲ್ಯಾನ್ ಇಗರ್ಜೆಕ್ ಏಕ್ ನವಿ ಆಸ್ತ್ ಜಾತೆಲಿ ಆನಿ ಇಸ್ಕಾಲಾಚ್ಯಾ ಭುರ್ಗ್ಯಾಂಕ್ ಖೆಳೊಂಕ್ ತಶೆಂತ್ ಹೆರ್ ಕಾರ್ಯಂಕೀ ಮೈದಾನ್ ಆಸ್ತೆಲೆಂ. ಪ್ರೈಮರಿ ಚಾ ಭುರ್ಗ್ಯಾಂನಿ ಖೆಳೊಂಕ್ ಹೈ ಸ್ಕೂಲಾಕ್ ವಸಾಜಾಯ್ ಮ್ಹಣ್ ನಾ.
ಹ್ಯೋ ಸರ್ವ್ ಸಂಗ್ತಿ ಫಿರ್ಗಜೆಚಾ ಲೊಕಾನ್ ಭಿಸ್ಪ್ ಸಾಯ್ಬಾಂಚಾ ಗುಮಾನಾಕಿ ಹಾಡ್ಲ್ಯಾತ್. ಸಾಯ್ಬಾನಿ ಹ್ಯಾ ವಿಷಯಾಂತ್ ಕೃಷಿ ಕಾಡಿನಾಸ್ತಾಂ ದುಸ್ರ್ಯೋ ವಾಟೊ ಪಳೊಂಕ್ ಆದೇಶ್ ದಿಲಾ ಮ್ಹಣ್ ಖಬಾರ್ ಆಸಾ.
ದೆಕುನ್ ದುಸ್ರ್ಯಾ ವಾಟಾನಿಂ ಹ್ಯಾ ಸಮಸ್ಸ್ಯಾಕ್ ಪರಿಹಾರ್ ಸೊದುನ್ ಕಾಡ್ಚೆಂ ಬೋವ್ ಬೊರೆಂ. ಸಬಾರಾನಿಂ ಹೆಂ ಯೋಜನ್ ಜ್ಯಾರಿ ಜಾಲ್ಯಾರ್ ಇಗರ್ಜ್ ಸಾಂಡುನ್ ದುಸ್ರ್ಯಾ ಇಗರ್ಜೆಕ್ ವೆಚೆಯ್ ಚಿಂತ್ಲಾ. ದೆಕುನ್ ಸಮಡ್ತ್ ಸಾಂಡುನ್ ವಚುಂಕ್ ತುಮಿ ಜಾವ್ನ್ ಆಸ್ಪದ್ ಕರ್ನ್ ದೀನಾಕಾತ್.
ಆನೀ ತುಮಿ ಹುದ್ದೆದಾರಾಂನೋ!! ತುಮ್ಕಾ 3 ವರ್ಸಾಂಕ್ ಅಧಿಕಾರ್ ದಿಲಾ ತರ್ ತೊ ಫಿರ್ಗಜ್ ಕುಟಾಮ್ ಬಾಂದುನ್ ಹಾಡುಂಕ್ ಶಿವಾಯ್ ಮೊಡುಂಕ್ ನಯ್! ಉಡಾಸ್ ಆಸೊಂ.
ಭಾಗೆವಂತ್ ಕುಟ್ಮಾ!! ಆಮಾ ಪಾಸಾತ್ ವಿನಾತಿ ಕರಾತ್ !!